Нова средба на американска и руска делегација. Овој пат домаќин е истанбул а на маса е ставено обновувањето на дипломатските односи меѓу САД и Русија. Ова е втора средба меѓу двете страни по онаа која се оддржа на почетокот на фебруари во Саудиска Арабија, а со која беше прекината политиката на изолација која Вашингтон и Западот ја спроведуваа кон Русија во изминативе три години.
Додека во Турција траат преговорите меѓу САД и Русија, Украинскиот петседател уште еднаш побара безбедносни гаранции за да се спречи можноста руската армија повторно да нападне…
„Гаранциите за мир и безбедност се клучот за спречување на Русија да уништува животи во другите нации. За сите нас ширум светот, е важно да не престане помошта на Америка.“ – Володимир Зеленски претседател на Украина.
Во пресрет на утрешната средба меѓу Доналд Трамп и Володимир Зеленски, американскиот претседател му порача на украинскиот колега да не се надева на прием во НАТО. Не е познато каква помош ќе успее да издејствува Украина, но за Трамп, амбицијата на Киев да се приклучи на воениот сојуз, не е разумна.
„НАТО? Заборавете на него. Мислам дека тоа е веројатно причината зошто започна целиот овој конфликт. – Ние нема да даваме безбедносни гаранции, туку ќе бараме Европа да го направи тоа, бидејќи тие се нејзини соседи. Сепак, ќе се погрижиме сè да оди како што треба.“ – Доналд Трамп претседател на САД.
А додека во Европската унија се разгледува можноста за испраќање на мировни трупи во Украина, Дмитриј Песков порача дека Русија нема намера да врати ниту еден дел од окупираната територија. Изјавата на портпаролот на Кремљ доаѓа еден ден откако рускиот министер за надворешни работи Сергеј Лавров посочи дека Русија бара целосна контрола врз четирите региони.
„Тоа се територии кои станаа дел од Русија и се вклучени во нашата државна уставна одредба како неотуѓив дел од Русија. Тоа е факт што ние апсолутно не можеме да го негираме или за тоа да разговараме.“ – Дмитри Песков портпарол на Кремљ.
Според рускиот устав, Доњецк, Луганск, Херсон и Запорожје се дел од Русија, иако руските сили не ги контролираат целосно овие региони, а Украина и меѓународната заедница ги сметаат за делови на Украина.
Извор: 24vesti.mk
