Земјотрес од четири степени кај Петриња, нема информации за материјална штета

Земјотрес со јачина од четири степени според Рихтеровата скала денеска е регистриран во областа Петриња, соопшти Хрватската сеизмолошка служба.

Засега нема информации за евентуална материјална штета.

Во соопштението се наведува дека сеизмографи на Сеизмолошката служба регистрирале прилично силен земјотрес во 12:52 часот со епицентар кај Табориште, на три километри југоисточно од Петриња.

Земјотресот бил со јачина од 4,0 степени според Рихтеровата скала, а интензитетот во епицентарот 5 – 6 степени според ЕМС.

Хрватските медиуми јавуваат дека земјотресот бил почувствуван во поширокото подрачје на Сисак, а дел од градот останал без струја.

Серија силни земјотреси ја погодија областа Петриња кон крајот на 2020 година, со јачина на најсилниот земјотрес од 6,2 степени според Рихтеровата скала. Тогаш неколку лица загинаа, имаше и повредени, а беше причинета голема материјална штета на поширокото подрачје на Банија.