Со новиот закон, сите трговци, без разлика на големината, ќе имаат законска обврска да ги објавуваат цените на своите производи на интернет. Ова ќе се врши секојдневно, со ажурирање на тековните продажни цени, што ќе овозможи поголема транспарентност и полесно споредување на цените од страна на потрошувачите. Сепак граѓаните со кои разговараше редакцијата на Рацин.мк се сомневаат дека ова ќе им ја зголеми куповната моќ.
– Не верувам дека на тој начин би се намалиле цените, бидејќи и сега постојано се расправаме околу цените со продавачите и во големите маркети кои се различни на рафтот, а различни во компјутерот за наплата. Што ќе смени ако се на сајт и дали треба јас да губам време прво на сајтовите, а потоа да споредувам во маркет, вели жителка на Ѓорче Петров.
Според пензионерот Здравко Т. потребно е да има голем број на инспекции, да ги контролираат цените, тоа ќе воведе некој ред.
-Инспекторатот спие, се имам јавувано да пријавам десоледности во цените, тие ми велат пратете меил. Во ред пратив меил и наместо да излезат ан терен ми вратија дека приговорот ќе биде прифатен ако им испратам фискална сметка од купените продукти, а јас всушност се жалев дека има недоследни цени и дека не ги купив продуктите. Сето тоа премина во една досадна преписка и се откажав од нови пријавувања. Навистина не знам што работат тие инспектори, вели тој.
Законот за заштита на потрошувачите, кој е во собраниска процедура, е предложен од парламентарното мнозинство. Пратеникот Бојан Стојановски истакна дека мерките се насочени кон заштита на стандардот на граѓаните. Од една страна, ќе се обезбеди јавност за цените преку веб-страниците на маркетите, а од друга, се предвидува активен надзор од инспекциските служби кои ќе санкционираат неспроведување на обврските.
Стојановски изјави дека ова решение носи три клучни придобивки:
-Транспарентност – полесен пристап до информации за цените.
-Фер конкуренција – сите трговци ќе бидат под истите услови.
-Заштита на потрошувачите – елиминација на скриените трошоци и нејасните цени.
Законот е инспириран од успешни модели во Израел, Италија, Франција и Хрватска, каде оваа практика довела до намалување на цените. Стојановски најави дека со објавувањето на цените на интернет ќе се поттикне развојот на дигитални алатки, кои ќе им овозможат на граѓаните директно да ги споредуваат цените и да донесуваат информирани одлуки за купување.
ИЗВОР: racin.mk
