БЕРЛИН (АА) – Германија денес категорично го отфрли планот на американскиот претседател Доналд Трамп да ја „преземе“ Газа и трајно да го пресели нејзиното палестинско население во други земји, јавува Анадолу.
Министерката за надворешни работи Аналена Баербок изјави дека решението за две држави со преговори останува единствен пат што ќе обезбеди Палестинците и Израелците да живеат во мир, безбедност и достоинство.
„Јасно е дека Газа – како Западниот Брег и Источен Ерусалим – им припаѓа на Палестинците. Тие ја формираат почетната точка за идната држава Палестина“, рече Баербок.
„Протерувањето на палестинското цивилно население од Газа не само што би било неприфатливо и спротивно на меѓународното право туку тоа би довело и до ново страдање и нова омраза“, предупреди таа.
Исто така, таа нагласи дека ОН, Европската Унија и земјите од Г-7 континуирано се противат на создавањето израелски населби на палестинските територии преку своите резолуции и одлуки.
„Цивилното население на Газа не смее да биде протерано, а Газа не смее да биде трајно окупирана или преселена. Не може да има решение над главите на Палестинците“, рече таа.
Нејзините забелешки се дадени по изјавата на Трамп дека „САД ќе го преземат Појасот Газа“ за време на прес-конференцијата синоќа заедно со израелскиот премиер Бенјамин Нетанјаху.
Трамп рече дека населението во Газа треба да се пресели во земји како Јордан и Египет, со тоа што САД ќе ја претворат земјата во „ривиера на Блискиот Исток“.
Предлогот беше отфрлен низ светот и од претставници на ОН и од голем број земји, вклучително Кина, Туркије, Палестина, Саудиска Арабија, Шпанија и Франција.
Извор: Anadolu Agency (AA)
