Директорот на Бирото за јавна безбедност, Александар Јанев ја предводи делегацијата на БЈБ која е во прва официјална посета на Интерпол во Лион, Франција.
Посетата се одвива на покана на генералниот секретар Валдеси Уркиза со кој одржале плодна работна средба.
Јанев вели дека стратешки и оперативни прашања важни за јакнење и модернизација на капацитетите на македонската полиција, нашето активно учество во глобалната полициска соработка биле во фокусот на денешната средба.
-Добивме признание за континуираниот придонес на македонската полиција во борбата против сите видови на криминал. Интерпол во нас препознава кредибилен партнер за соработка за која сите се заложивме дека ќе продолжи и во иднина. Се запознавме со иновациите за полициското работење, активностите на Извршниот Директорат за полициски сервиси, го посетивме и Командниот и координативниот центар на Интерпол, кој 24 часа дава оперативна поддршка на сите 196 држави членки на меѓународната полициска организација, а се запознавме и со активностите и придонесот на полицискиот службеник од МВР упатен на работа во Генералниот секретаријат на Интерпол. Професионализмот и посветеноста на македонската полиција е препознаена како силен партнер кој придонесува кон глобалната безбедноста и безбедноста на нашите граѓани и земја, истакнува Јанев.
ИЗВОР: kurir.mk
