АНКАРА (АА) – Турскиот Бајрактар ТБ3 стана првото беспилотно летало кое успешно полета и слета на брод, известува Анадолу.
Министерството за одбрана на Туркије објави дека оствариле уште еден сон.
„Ова е моментот што го чекавме со голема возбуда и сонот се оствари. Нашиот Бајрактар ТБ3, нашата национална гордост, успешно го изведе првото полетување и првото слетување на воениот брод ТЏГ Анадолу. Им честитаме на сите кои го дадоа својот придонес да се случи ова и се радуваме на уште поубави денови кога дополнително ќе се зголеми нашата национална моќ“, се наведува во соопштението.
Бајрактар ТБ3, исто така, влезе во светската авијациска историја како првото беспилотно летало што слета и полета од брод со кратка писта.
Ова беспилотно летало на 19 ноември успешно полета од пистата на бродот ТЏГ Анадолу и по 46-минутен лет над местото каде што се спојуваат Егејското и Средоземното Море, се врати и слета на истата писта без да користи опрема за поддршка при слетување.
„Овој пробен лет ја отвори вратата за нова ера во историјата на авијацијата и морепловството“, се вели во соопштението.
ТЏГ Анадолу е најголемиот турски воен брод што официјално ѝ беше испорачан на турската морнарица во април 2023 година.
Воениот брод ТЏГ Анадолу е долг 231 метар и широк 32 метри и може да превезе товар од околу 27.000 тони.
Бајрактар ТБ3 го изведе својот прв лет на 27 октомври 2023 година.
Извор: Anadolu Agency (AA)
