Свечља: Србија го прекрши договорот за регистарски таблички

Врз основа на случаите презентирани на нашите гранични точки, Србија целосно го прекрши овој договор, пишува косовскиот министер за внатрешни работи Џелал Свечља

Министерот за внатрешни работи на Косово Џелал Свечља соопшти дека косовската полиција на неколку гранични премини идентификувала автомобили со таблички „КМ“ (Косовска Митровица), регистрирани во декември 2022 година.

Според него, ова е прекршување на договорот што Косово и Србија го постигнаа во ноември минатата година.

„Врз основа на договорот меѓу Република Косово и Србија во Брисел во ноември 2022 година, Србија се согласи да го запре производството на нелегални регистарски таблички и пререгистрацијата на постоечките. Врз основа на случаите презентирани на нашите гранични точки, Србија целосно го прекрши овој договор“,

напиша Свечља на Фејсбук.

Тој додава дека во согласност со законодавство и договорот постигнат во Брисел, косовската полиција не дозволила тие возила да влезат во Косово.

Свечља посочува дека такви возила нема да смеат да влезат на територијата на Косово.

„Ги повикуваме сите граѓани, сопственици на автомобили со такви регистарски таблички, да одат во центрите за граѓанска регистрација каде било во Косово за да ги регистрираат своите возила со косовски таблички“,

вели тој.

Лајчак и Ескобар и официјално в петок во Белград и Приштина, во тимот на ЕУ се вклучува и Италија

Претходно директорот на Канцеларијата за Косово на Владата на Србија, Петар Петковиќ и Српска листа соопшти дека на 18 јануари на граничните премини Јариње и Брњак на северот на Косово било спречено движење на возила со таблички „КМ“.

Косово и Србија постигнаа договор за табличките „КМ“ на крајот на ноември, по интервенција на меѓународната заедница.