Десет лица се соочуваат со затворска казна поради наводно ширење на лажни тврдења дека француската прва дама, 72-годишната Брижит Макрон, е маж по име Жан-Мишел Трогно, гласина што широко се прошири на социјалните мрежи, а потоа ја засилија теоретичари на заговор и екстремно десничарски активисти.
Обвинетите – една жена и шестмина мажи – може да добијат до две години затвор доколку бидат прогласени за виновни за онлајн вознемирување на Макрон.
Обвинителите тврдат дека групата водела координирана кампања за понижување и клевета против првата дама, објавувајќи стотици објави кои лажно ја опишувале како маж и ја споредувале нејзината врска со претседателот Макрон (47) со педофилија.
Неколкумина обвинети во судот се обиделе да ја минимизираат својата улога, тврдејќи дека нивните објави биле „на шега“ или „саркастични“.
Еден од нив, прашан за објавите во кои тврдеше дека Брижит Макрон е маж или дека има машки полов орган, рекол дека само споделувал коментари кои му биле „смешни“.
Тој изјавил: „Како и многумина, се прашувам зошто сум овде денес. Денес, можат да те тужат за твит.“
Друг обвинет рекол дека неговите коментари биле само „хумор“ и прашал дали „во Франција сега треба дозвола за да направиш шега“.
Тој додал дека ги споделувал објавите за Макрон „за да ги информира луѓето“, не со цел вознемирување.
Некои отишле подалеку, тврдејќи дека самото судење е напад врз слободата на изразување.
Еден сопственик на галерија од Париз рекол дека случајот е „судење против слободата на мислата“, а друг изјавил дека тој и неговите сообвинети се „вистинските жртви на вознемирување“.
Истражителите велат дека кампањата имала силно лично влијание врз Макрон, која јавно зборувала за тоа како теориите на заговор ѝ го нарушиле здравјето и угледот.
Судијата изјавил дека вознемирувањето довело до „сериозно влошување“ на нејзината физичка и ментална состојба.
Во исказ до полицијата, Макрон рекла дека за гласините ѝ било поставувано прашање дури и при официјални посети во странство и дека тие станале „познати на секоја сопруга на шеф на држава“.
Меѓу обвинетите е и Орелиен Поирсон-Атлан (41), публицист познат на социјалните мрежи како „Зое Саган“, кој често се поврзува со теории на заговор, како и Делфин Ж. (51), самопрогласен духовен медиум со псевдонимот Амандин Роа, против која Макрон поднесе тужба за клевета во 2022 година.
Случајот повторно ја отвори дебатата во Франција за границите на онлајн изразувањето и одговорноста на корисниците за вознемирувачки кампањи.
Поддржувачите на обвинетите тврдат дека владата се обидува да ја задуши критиката, додека адвокатите на Макрон нагласуваат дека непроверените онлајн клевети можат да предизвикаат сериозна штета во реалниот живот.
Бракот на Емануел и Брижит Макрон отсекогаш бил предмет на озборувања поради контроверзниот почеток.
Тие се запознале во 1992 година кога Емануел бил ученик, а таа негова професорка по драма и мајка на три деца. Некои тврделе дека врската била „неодговорна“, но двајцата секогаш го негирале тоа.
Парот се венчал во 2007 година, десет години пред Макрон да стане претседател.
Во поново време, Макрон повторно беше цел на напад кога нејзиното име било заменето со машко на официјалниот даночен портал, што таа го пријавила како хакерски напад.
Лажните гласини дека е родена како маж постојано ги шират теоретичари на заговор и десничарски личности, вклучително и американската коментаторка Кендас Овенс.
Овенс во март изјавила дека ќе ја „стави на коцка својата професионална репутација“ на тоа тврдење.
По тужбата за клевета поднесена во јули, таа возвратила дека ќе бара „медицински преглед“ како доказ на суд во САД. Судењето во Париз се очекува да трае цела недела, а пресудата треба да биде донесена подоцна годинава.
Тоа следи по одделен случај во кој Макроновите тужеле Кендас Овенс за ширење „измислици и клевети“ што довеле до „глобална кампања на понижување и вознемирување“.
Овенс ја повторила таа теорија на своите канали, повикувајќи се на француските блогерки Наташа Реј и Амандин Роа, кои први ја објавиле во видео на „YouTube“ во 2021 година.
Иако Макронови првично ја добија тужбата против нив во 2024 година, одлуката била поништена на апелација под изговор на „слобода на изразување“.
Во новата тужба поднесена во САД, Емануел и Брижит Макрон побараа обесштетување и завршување на, како што ја нарекоа, „кампањата на клевета и вознемирување“.
Во нивната изјава се наведува:
„Бидејќи г-ѓа Овенс упорно ги повторуваше лажните тврдења дури и по нашите барања за извинување, решивме дека судската постапка е единствениот преостанат начин за правда. Нејзината кампања имаше за цел да нè понижи и да предизвика болка на нашите семејства. Се надеваме дека оваа постапка конечно ќе ја стави вистината на свое место.“
Пренесува: Дејли Мејл
Извор: vecer.mk
