ИСТАНБУЛ (АА) – Турскиот претседател Реџеп Таип Ердоган уште еднаш истакна дека турските власти ќе направат сè што е потребно за да им помогнат на луѓето во областите погодени од разорните земјотреси на југот на Туркије, јавува Анадолу.
Ердоган ги посети погодените од земјотресот, кои престојуваат во Студентскиот дом во квартот Бујукчекмеџе во Истанбул.
„Нашата цел е за една година да го подигнеме на нозе регионот погоден од земјотресите со изградба на 319 илјади домови со сета потребна инфраструктура, како и општествени и деловни објекти, односно вкупно 650 илјади домови“, рече Ердоган.
Тој истакна дека во последните месец и половина по денот на земјотресот завршени се акциите за пребарување и спасување, реализирана е дистрибуцијата на итната помош и брзо се отстранети урнатините.
Додаде дека продолжуваат со изградба на привремени сместувачки објекти, како и со изградба на постојани домови.
Потсети дека граѓаните на Туркије се покрај погодените од земјотресите од првиот ден.
„Исто така, никогаш нема да ја заборавиме меѓународната помош, особено од пријателските и братски земји“, рече Ердоган.
Истакна дека во изминатите денови ги посетиле погодените градови од земјотресите каде присуствувале на свеченостите по повод почетокот на изградбата на новите станбени згради.
„Ќе работиме деноноќно додека не ги обновиме Кахраманмараш, Хатај, Адијаман, Малатија, Газиантеп и сите наши други градови кои претрпеа штети во земјотресите“, рече турскиот претседател.
Два разорни земјотреси со јачина од 7,7 и 7,6 степени според Рихтер на 6 февруари ги погодија јужните делови на Туркије со епицентар во Кахраманмараш.
Бројот на загинати во разорните земјотреси достигна 50.096.
Над 13,5 милиони луѓе во Туркије се погодени од разорните земјотреси, како и многу други на северот на Сирија.
Извор: www.aa.com.tr
