Како што информираат од МНР, двајцата повредени ученици заедно со својот ментор/наставник биле дел од деветчлена група која земјотресот ја затекнал во градот Кахраман Мараш, во југоисточниот дел на Турција, каде што престојувале преку програмата „Еразмус плус“
Од МНР информираат дека ниту учениците ниту менторот се во животна опасност
Двајца македонски државјани се повредени во разорниот земјотрес од 7,8 степени по Рихтеровата скала што утрово го погоди југоисточниот дел на Турција, соопшти Министерството за надворешни работи (МНР).
Како што информираат оттаму, станува збор за двајца ученици кои заедно со својот ментор/наставник биле дел од деветчлена група која се затекнала во загрозениот регион во Турција, каде што престојувале преку програмата „Еразмус плус“.
Македонските претставништва обезбедиле информации и стапиле во контакт со деветте наши државјани.
Во земјотресот, според информациите од МНР, двајцата ученици, чија возраст не е наведена во соопштението, се здобиле со телесни повреди, од кои едниот со потешка.
Од МНР информираат дека ниту учениците ниту менторот се во животна опасност.
„Нашите претставништва обезбедија информации и стапија во контакт со деветте наши државјани кои се наоѓаат во загрозениот регион. Се работи за осум ученици и нивни ментор/наставник, кои преку програмата ‘Еразмус плус’ престојуваат во Република Турција. Како последица од земјотресот, двајца од учениците се здобиле со телесни повреди: едниот ученик е со потешки повреди – скршеница на која во моментов работат медицински лица и е во фаза на санирање – додека вториот ученик е со полесни повреди. Ниту еден од учениците и Менторот не се во животна опасност“,
се наведува во соопштението од МНР.
Учениците и нивниот ментор, според информациите од МНР, се наоѓаат во градот Кахраман Мараш, каде што по инструкција на МНР веќе е упатен дипломат од Амбасадата во Анкара за да помогне во евакуацијата.
„По инструкција на МНР, дипломат од Амбасадата во Анкара е веќе упатен во регионот за да помогне во евакуацијата на учениците од градот Кахраман Мараш, како и да обезбеди информација и присуство директно на терен во најзагрозените делови за евентуални дополнителни интервенции“,
велат од МНР.
Оттаму информираат дека МНР преку Амбасадата во Анкара и Генералниот конзулат во Истанбул внимателно ја следи ситуацијата во југоисточна Турција по силниот земјотрес рано изутринава, и во континуитет известува за состојбата во загрозените подрачја.
„Информациите од теренот упатуваат за исклучително силен земјотрес со големи последици по животите на луѓето затекнати во погодениот регион; голем број жртви кои надминуваат неколку стотици граѓани, голем број повредени лица, како и сериозна материјална штета која ја отежнува состојбата на терен“,
се посочува во соопштението од Министерството за надворешни работи.
Досега нема информација за други наши државјани што се наоѓаат во загрозена состојба или на кои им е потребна асистенција, велат од МНР.
Сепак, нашите претставништва остануваат во континуирана комуникација како со надлежните институции на Турција така и со наши граѓани кои се информираат за состојбите на терен.
Од МНР уште еднаш потсетуваат дека нашите дипломатски претставништва во Турција се на 24-часовно располагање за сите евентуални прашања, на телефонските броеви:
- +905394569710 во Анкара,
- +905456149777 во Истанбул
- СОС-телефонот на МНР во Скопје 38975273732.
Шефот на дипломатијата Бујар Османи претходно денеска преку објава на Фејсбук најави помош за Турција, а подготовките за нејзино испраќање, како што напиша, се веќе во тек.
Во меѓувреме Црвениот крст на Северна Македонија информира за отворени сметки и телефонски броеви на кои сите заинтересирани правни субјекти и граѓани може да донираат парична помош за настраданото население погодено од катастрофалниот земјотрес во Турција и Сирија.
ИЗВОР: 360stepeni.mk
