Министерката за финансии, Гордана Димитриеска-Кочоска, остварила средба со извршниот директор на Меѓународен монетарен фонд, Јерон Клик, за време на нејзиниот престој во Вашингтон, каде разговарале за економските политики и реформските процеси во земјава.
Како што информира Димитриеска-Кочоска, главен приоритет на Владата останува зачувувањето на макроекономската стабилност и стабилноста на јавните финансии, како предуслов за забрзан и одржлив економски раст.
Таа истакнала дека институциите се посветени на фискална консолидација, подобрување на дисциплината во управувањето со јавните средства, како и одржување на високо ниво на капитални инвестиции со цел поддршка на економијата.
Воедно, министерката нагласила дека внимателно се следат глобалните економски предизвици, со цел навремено да се одговори на потенцијалните ризици.
Димитриеска-Кочоска посочила дека поддршката од ММФ има значајна улога во спроведувањето на реформите и зајакнувањето на институционалните капацитети, додавајќи дека крајната цел е создавање стабилна економија која ќе обезбеди сигурност за граѓаните и предвидлива деловна средина за бизнисот.
