„Знаме со голема Албанија е кривично дело“ – Ибрахими: Потрагата по момчето е исто дејство како на Вучиќ

Шефот на полицијата, Оливер Спасовски смета дека веењето на знамето со карта на Голема Албанија, во Македонија е кривично дело. Според него, полицијата работи на идентификување на лицето кое го вееше знамето на собирот во Тетово при посетата на косовскиот премиер Албин Курти.

„Имаме информации кои веќе ги прибираат колегите и од СВР Тетово и на ниво на Министерството. Јас мислам дека ќе се утврди идентитетот на ова лице. Класификацијата секако е кривично дело, согласно препораките што ги даде јавниот обвинител и на основа на тоа ќе се преземат соодветни мерки“, вели Оливер Спасовски.

Во врска со оваа реагираше генералниот секретар на Алтернатива, Зекирија Ибрахими.

Вели дека потрагата по момчето е слично дејство со тоа на Вучиќ кога го бараше Балистот Морина, момчето кое со дрон го вееше истото знаме на белградскиот стадион на натпреварот Србија – Албанија.

„Власта СДСМ-СОРАВИА-Алијанса за Албанците и денес продолжува да трага по Албанецот кој истакнал знаме на етничка Албанија на собирот во Тетово. Исто како пред неколку години кога Вучиќ трагаше над и под земја за момчето кое со дрон го вееше знамето на етничка Албанија на натпреварот Србија-Албанија. Позната српска матрица, театарот е македонски, а има и некои албански статисти. Прашањето кое се поставува е дали овие од владата ќе го уапсат и продавачот на картите на Голема Македонија сред скопски плоштад?!“, порача Зекирија Ибрахими.

Настанот се случи на 11 август во Тетово, кога на посета на градот беше премиерот на Косово, Албин Курти, кој во текот на неговиот говор порача Македонија да биде што поблиску Косово, Албанија и Бугарија и што подалеку од Србија.