НИКОПОЛ (АА)
– Давид КАЧКАЧИШВИЛИ
Жителите на градот Никопол, во Дњепарската Област, со месеци живеат под руски напади, пишува Анадолу.
Во Никопол, каде пред војната живееја околу 106.000 жители, денес во градот живеат многу помалку – 43.000.
Нуклеарната електрана Запорожје, која е под контрола на руската војска од март 2022 година, се наоѓа на спротивниот брег од езерото Каховка и јасно е видлива од Никопол.
Додека руските сили се распоредени на спротивниот брег од браната изградена на реката Дњепар, регионот во кој се наоѓа Никопол и населбите од страна на браната се под контрола на украинската војска.
Меѓу подрачјата во кои се лоцирани руските сили и градот постојат само езерото со браната, а артилериските напади врз Никопол се честа појава. Објектите во овој украински град претрпеа сериозни оштетувања.
– Интензивирани нападите врз Никопол
Во руските напади на Никопол оштетена е и куќата на Сергеј Троцјук (57). „Вестите не се добри за нас. Пукаат на нас секој ден. Постојано се слушаат сирени“, изјави Троцјук.
Тој рече дека во нападите е оштетена и неговата куќа.
„Топовска граната синоќа ја погоди и нашата куќа. Мојата куќа и куќата на моите соседи се оштетени. Скршени се прозорците. Бевме дома во тие моменти. Секојдневно сме цел на напади и никогаш не се знае гранатите и ракетите кое место ќе го погодат“, рече Троцјук.
Тој наведе дека нападите врз Никопол се интензивирани од минатото лето.
„До Енергодар има само 6 километри. Пукаат од тоа подрачје. Тука никој не е безбеден“, рече Троцјук.
И куќата на Василиса Соколова (19) е делумно уништена за време на нападите.
Во времето кога е извршен нападот, таа била во куќата заедно со својата сестра и мајка.
„Нападот се случи на 28 февруари, околу 2:20 часот. Нѐ разбуди звукот на експлозија. Ништо не можеше да се види од димот“, раскажа Соколова.
Извор: www.aa.com.tr
