АНКАРА / ИСТАНБУЛ (АА) – Украинскиот претседател Владимир Зеленски денес ја нагласи важноста на територијалниот интегритет на неговата земја и повторно ја истакна потребата Украина да добие безбедносни гаранции за време на неговата официјална посета на Туркије, јавува Анадолу.
„Како држава, ние сакаме мир, сакаме крај на војната. Но, сакаме тој крај да се заснова на одредени безбедносни гаранции. Очекуваме овие безбедносни гаранции да ни ги обезбедат САД, ЕУ, Туркије и цела Европа“, изјави Зеленски на церемонијата за отворање на новата зграда на украинската амбасада во Анкара.
Претседателот Зеленски нагласи дека Украина никогаш нема да се откаже од својот територијален интегритет и суверенитет, потенцирајќи дека не може да постапи спротивно на украинскиот Устав.
„Никогаш, под никакви околности, нема да ги признаеме нашите привремено окупирани територии како дел од Русија. Тие се дел од Украина“, порача тој.
Зеленски повтори дека Украина ќе ги врати своите територии преку дипломатски средства, додавајќи: „Не сакаме да ги загубиме нашите луѓе – тие се нашето најголемо богатство“.
Тој истакна дека овие прашања ќе бидат тема на разговор и на неговата средба со претседателот на Туркије, Реџеп Таип Ердоган.
– Улогата на Туркије во посредувањето и хуманитарните напори –
Зеленски посочи дека имал конструктивни разговори со Ердоган, нагласувајќи ја значајната улога на Туркије како посредник во војната меѓу Русија и Украина.
Посебно ги истакна напорите на Туркије во размената на заробеници и обезбедувањето прехранбена сигурност.
„Враќањето на Украинците дома останува наш приоритет“, рече тој, притоа изразувајќи благодарност до Туркије за помошта во воспоставувањето коридор за извоз на украинското жито.
„Благодарение на напорите на Туркије, успеавме да воспоставиме прехранбен коридор. Но, поради Русија, овој коридор беше нарушен, што доведе до недостиг на прехранбени производи за луѓето низ светот, особено за оние во најголема потреба“, рече Зеленски.
Тој им се заблагодари на сите земји што работат на одржување на прехранбената безбедност, посочувајќи на испораките на украинско жито во африканските земји и Сирија.
– Симболично отворање на Амбасадата –
Украинскиот претседател го опиша отворањето на новата амбасада како „симболично“, посочувајќи на присуството на претставници од Украина и кримскотатарската дијаспора.
Тој истакна дека овој проект ја добил неговата целосна поддршка уште од самиот почеток, а ја пофали и улогата на Андри Сибиха, украинскиот министер за надворешни работи и поранешен амбасадор во Анкара.
Како дел од дипломатските напори на Украина, Зеленски го најави именувањето на Нериман Џелал како нов украински амбасадор во Анкара.
– Дипломатија за ставање крај на војната –
Зеленски повтори дека Украина останува посветена на дипломатијата како средство за завршување на војната, повикувајќи ги сите медијатори, вклучувајќи ги Русија, САД и Европа, на значајни преговори.
Сепак, тој беше јасен дека Украина нема да прифати никаков исход што ќе го загрози нејзиниот територијален интегритет или суверенитет.
„Украина ги признава кримските Татари како автохтон народ на Украина“, потенцираше Зеленски, повторно нагласувајќи го ставот на Киев дека ќе ги врати окупираните територии преку дипломатски средства, но без компромиси во однос на суверенитетот на земјата.
Извор: Anadolu Agency (AA)
