Занаетчиите во регионот станаа ендемски вид. Младите не сакаат повеќе да работат ниту за поголема дневница, а старите мајстори работат и кога се во пензија.
“Во Македонија има хроничен недостиг на занаетчии, односно мајстори на различни профили и барањето на квалитетен мајстор е како барање игла во пласт сено. Дека занаетчиството во земјава полека изумира потврдува и нашиот соговорник, мајстор кој 16 години го работи својот занает.”
Но, иако многу млади луѓе не се заинтересирани за учење на занает, сепак мајсторите во Македонија можат да заработуваат добро, посочува Георгиев.
Меѓутоа, работата и не е така лесна и едноставна, бара многу труд пред сè, а потоа и време, знаење, но и материјал за работа, а ако на ова ги додадеме и давачките кон државата, тогаш можеби и можеме да ја сфатиме незаинтересираноста на младите, додава штипскиот занаетчија.
Факт е дека најголемиот дел од младите во Македонија сонуваат да работат во ИТ секторот, правото и економијата, но не и во занаетчиството, бидејќи сметаат дека е тешко и неисплатливо, а за занает е потребна пред сè волја, уверува нашиот соговорник.
Можеме да констатираме дека лоша иднина се предвидува на речиси сите занаетчиски гранки, кои како занаети, најверојатно ќе останат во меморијата на повозрасните генерации.
Извор: 24vesti.mk
