АНКАРА (АА) – Вториот конвој шлепери кои носат хуманитарна помош почна да влегува во Појасот Газа од египетска страна, преку граничниот премин Рафах, објавија египетските медиуми, пренесува Анадолу.
Cairo News Channel објави дека копнениот премин Рафах е отворен втор ден по ред за достава на нова хуманитарна помош во Појасот Газа.
Вчера конвој од 20 шлепери со хуманитарна помош влезе во Појасот Газа преку граничниот премин Рафах. Тоа беше прва испорака на помош за Газа од избувнувањето на судирот меѓу Израел и палестинската група Хамас на 7. октомври.
Газа доживува тешка хуманитарна криза. Овој регион е без струја, а водата, храната, горивото и медицинските материјали се при крај.
Борбите започнаа на 7. октомври, кога Хамас ја почна операцијата „Поплава Ал Акса“, ненадеен напад со низа лансирања на ракети и инфилтрирање во Израел преку копно, море и воздух. Хамас наведе дека операцијата е одмазда за упадите во џамијата „Ал Акса“ и зголеменото насилство од страна на еврејските доселеници врз Палестинците.
Израелската војска како одговор ја започна операцијата „Железни мечеви“ кон позициите на Хамас во Појасот Газа. Оваа операција доби димензии на неселективно бомбардирање на цивилни населби, станбени објекти, џамии, цркви, но и болници.
Според податоците на палестинското Министерство за здравство, бројката на загинати во Газа во текот на израелските бомбардирања се зголеми на 4.651, од кои 1.873 се деца, а 1.023 се жени. Повредени се 14.245 лица.
Во нападите на Хамас врз Израел загинаа повеќе од 1.400 лица.
