Директорот на Канцеларијата за Косово и Метохија, Петар Петковиќ кажа дека синоќа во северниот дел на Митровица имало вистинска воена опсада и дека косовскиот премиер Албин Курти наместо да работи на намалување на тензиите, работел на предизвикување војна. Под вакви околности, според Петковиќ, Белград не гледа како може да продолжи понатамошниот дијалог за деескалација.
„Специјалците на Курти со долги цевки, оклопни возила го окупираа северот на Митровица, дојдоа од јужниот дел на Митровица со над 30 оклопни возила, под маски, со долги цевки. Ја малтретираа цела северна Митровица, создадоа безбедносен обрач, патролираа во центарот на градот, имаа свои контролни пунктови на периферијата на градот, запираа автомобили, ги претресуваа луѓето, ги удираа со пиштоли и пцуеле, се обидеа да уапсат неколкумина“,
рече Петковиќ.
Тој рече дека косовскиот премиер константно провоцира, сакајќи да започне нов конфликт и војна. За барањата на САД и Велика Британија да се ослободат косовските полицајци кои пред неколку дена беа уапсени на територија на Србија, Петковиќ вели дека барањето е шокантно, бидејќи сите говорат за нивно ослободување, но не и за ослободувањето на Србите во Косово.
„Ние не одлучуваме кога треба да се ослободат полицајците, ние сме правна држава за тоа одлучува обвинителството и судот. Не се одлучува а тоа во амбасади, ниту пак со какво било соопштение“,
рече Петковиќ.
Тој изјави дека во такви околности не гледа како може да продолжи дијалогот бидејќи тоа подразбира нормализирање на односите, а ова што се случува е целосно ненормално и насилно и спротивно на дијалогот.
„За тоа ќе одлучи Александар Вучиќ, но не гледам простор за дијалог. Кога Харадинај воведе даноци од 100 отсто, Вучиќ не отиде во Брисел додека тоа не беше повлечено бидејќи сакаа да го натераат Белград да капитулира. Тоа сега се обидува да го направи Курти со забраната за влез на стоки“,
изјави Петковиќ.
Вчера од Струга, премиерот на Косово, Албин Курти изјави дека сите поранешни југословенски републики прогласија независност и тоа беше независност од Белград, а сега ни треба Србија да прогласи независност од Косово, од Северна Македонија, од Хрватска, од Словенија, од Црна Гора зашто Србија де јуре ја признава нивната независност, но тоа не го прави де факто. За уапсените полицајци пак, тој повтори дека тие биле грабнати на територијата на Косово
„Пред два дена тројца полицајци беа грабнати од страна на специјални воени и полициски единици на Србија. Додека зборуваме тие се соочуваат со српски судови. Наводно обвинител го повлекол обвинението за тероризам против нив и тие сега се товарат за незаконско поседување оружје. Тие беа грабнати еден километар на територијата на Косово, тие беа во акција да спречат шверц на стока“,
рече Курти.
Извор: 360stepeni.mk
