Завојуваните страни се согласиле дека за време на прекинот на огнот ќе се воздржат напади, употреба на воени авиони или беспилотни летала, артилериски напади, засилување на позициите и надополнување на силите и дека ќе се воздржат од обиди да постигнат воени придобивки
Завојуваните страни во Судан денеска се согласија на 72-часовен прекин на огнот и тоа еден ден пред меѓународната донаторска конференција за намалување на страдањата на цивилите и суданските бегалци во соседните земји.
Прекинот на огнот меѓу суданската армија и ривалските Сили за брза поддршка (RSF), со посредство на САД и Саудиска Арабија, започна во 6 часот наутро и се очекува да траат до среда.
Завојуваните страни се согласиле дека за време на прекинот на огнот ќе се воздржат напади, употреба на воени авиони или беспилотни летала, артилериски напади, засилување на позициите и надополнување на силите и дека ќе се воздржат од обиди да постигнат воени придобивки.
Тие се договорија и да дозволат непречено движење и испорака на хуманитарна помош низ целата земја.
Војната избувна во Судан во средината на април по долготрајната борба за власт меѓу де факто претседателот Абдел Фатах ал-Бурхан и потпретседателот Мохамед Хамдан Дагл.
Оттогаш, имаше бројни прекини на огнот, но тие постојано беа прекршувани.
Двајцата генерали првично ја презедоа власта заедно во 2021 година.
Според ОН, повеќе од 2,2 милиони луѓе се раселени поради борбите.
Агенциите на Обединетите нации во петокот објавија дека на речиси 25 милиони луѓе им е потребна хуманитарна помош во земјата, а четири милиони деца и бремени жени и доилки се акутно неухранети.
Во понеделник, Обединетите нации ќе ја свикаат ветената конференција со владите на Египет, Катар и Германија за поддршка на хуманитарниот одговор во Судан и бегалците кои бегаат во соседните земји.
Извор: 360stepeni.mk
