Судијата Бојан Мартиновски е единствен кој се пријавил на огласот на Судскиот совет за избор на претседател на Основниот суд во Охрид, додека на огласот за претседател на Основните судови во Берово, Радовиш и Делчево, ниту еден судија не се кандидирал. Членовите на Судскиот совет на денешната 520 седница едногласно одлучија да биде објавен повторно оглас за избор на претседател на Основните судови во Делчево, Берово и Радовиш. Судијката Весна Дамева член на Судскиот совет образложи дека Комисијата за рангирање на Судскиот совет му предлага повторно да огласи оглас за избор на претседател на Основните судови во Делчево, Берово и Радовиш.
На денешната седница на Судскиот совет се разрешуваа и судии поротници во неколку судови низ државата. Судскиот совет направи и анализа колку судиски места се слободни, односно неполнети низ основните судови во државата. Судијата, Данка Ристова член на Судскиот совет истакна дека анализата покажува дека согласно систематизацијата мора да има 456 судиски места, а во моментов не се пополнети 163 судиски места.
- Имајќи во предвид дека обврската за утврдување на слободни судиски места во Основните судови е лимитирана со законски рок, Комисијата одлучи да не ги чека резулатати од огласот за прием на нови судии од завршените слушатели од осмата генерација, кои се на број 19. Од расположивите податоци бројот на места по систематизација изнесува 456 места, а моментално се пополнети 294 судиски места од кои еден судија до крајот на 2025 година ќе се пензионира, односно не поднел барање за судиската функција по условите за старосна пензија. Тоа значи дека согласно анализата за потребни судиски места за ажурно и навремено постапување потребни се 163 судии во основните судови. Согласно наведеното Комисијата му предлага, вели Ристова.
Членовите на Судскиот совет побараа Академијата на судии и јавни обвинители да објавуваат огласи за нова генерација на судии и јавни обвинители, или да се направат законски измени.
Во моментов слободни судиски места има во основните судови има и тоа во: Берово три, Битола 11, Виница два, Велес пет, Гевгелија пет, Гостивар три, Дебар едно, Делчево два, Кавадарци четири, Кичево осум, Кочани три, Кратово два, Крива Паланка два, Куманово 11, Крушево три, Неготино два, Охрид десет, Прилеп 11, Радовиш четири, Ресен еден, Свети Николе еден, Основен кривичен суд Скопје 16, Основен граѓански суд Скопје 16, Струга 12, Струмица осум, Тетово десет, Штип седум слободни судиски места.
ИЗВОР: racin.mk
