Од 22 до 25 април во Националната опера и балет (НОБ) за првпат ќе се одржи манифестацијата Денови на македонски кореографи. Според уметничката раководителка на Балетот, Марија Кичевска-Шокаровска, со овој настан се одбележуваат 20 години од отворањето на Малата сцена во МОБ.
Менаџерот на Операта и Балетот, Киро Павлов рече дека после повеќегодишно нефункционирање на Малата сцена, ја отвораат за соработка не само за балетските уметници од НОБ, туку и како простор за креација на уметници од балетските академии.
Организаторка на Деновите на македонски кореографи е кореографката и балестки солист Саша Евтимова, која рече дека отсекогаш ѝ било сон во една вечер да се соберат современи македонски кореографи, а Малата сцена е платформа која дава еден креативен поход каде мож креативно да се изразат.
„Овој настан е значаен и за младите кореографи кои се развиваат и им треба простор, а нормално и на етаблираните кореографи, како Рисима Рисимкин, Искра Шукарова, Олга Панго, Игор Киров. Моите почетоци како кореограф се на Малата сцена во 2006. Само малата сцена може да биде платформа за нови, млади, креативни сили кои сакаат да се изразат или во копродукција со НОБ или независни продукции“, рече Евтимова на денешната прес-конференција.
Деновите на македонски кореографи ќе се отворат со премиерата на „Мокументари“ (Mockumentary), во кореографија на Адријана Данчевска-Ровчанин и премиерата на „Ехо на баронот“ во кореографија на Дејан Митровски. Претставите се во продукција на Скопје танцовиот театар.
„’Мокументари’ е танцова претстава која ја истражува политичката сцена и улогата на изведувачот во таа приказна“, рече кореографката.
Музиката е на Александар Гроздановски, сценографија на Ивана Мојсовска. Настапуваат Дејан Битровски и Данчевска-Ровчанин.
Кореографијата и концептот на „Ехо на баронот “ се на Битровски, музиката е на ХЕРЗЕЛ, костимите од Скопје танцов театар, сценографијата на Матеа Мијановиќ. Настапуваат Анастасија Данчевска, Стефани Шаршми и Нина Петрушевска.
„Ова е танцова претстава што ја истражува психолошката манипулација во современото општество преку темите на синдромот Минхаузен и неговата модерна манифестација. Изведбата прикажува како луѓето се принудени да создадат искривени верзии од себе под влијание на социјалните медиуми, дезинформациите и општествените очекувања. Користејќи танц, музика и визуелни елементи, претставата ја нагласува борбата за зачувување на автентичниот идентитет во нашата ера“, рече Битровски.
Во останатите денови ќе има и изложба на фотографии „Вечни тела“, концепт на кореографката и професорка Искра Шукарова, ќе се изведе претставата на кореографката и солистка Саша Евтимова, „Болеро“, ќе има премиера на „Д како Дездемона“ на кореографката и професорка Рисима Рисимкин. Манифестацијата ќе заврши со изведбата на „Патување“ на кореографот Џан Арслан од Турција.
Б. НЕСТОРОСКА
ИЗВОР: sdk.mk
