Производството на електрична енергија од соларни системи во Европската Унија во 2024 година за првпат го надмина количеството струја произведено во термоцентралите на јаглен, покажува извештајот на тинк-тенкот „Ембер“.
Според извештајот, соларната енергија сочинувала 11% од вкупното производство на електрична енергија во ЕУ во 2024 година, додека уделот на јагленот паднал под 10% за првпат во повеќе децении. За споредба, во 2023 година соларната енергија учествуваше со 9,3% од енергетскиот микс на ЕУ.
Истовремено, производството на електрична енергија од ветер останало речиси непроменето, додека производството од гасни централи се намалило, достигнувајќи удел од 15,7% во вкупното производство.
Овие промени се дел од стратегијата на ЕУ за декарбонизација и намалување на енергетската зависност од трети земји, особено од Русија. Крис Рослоу, раководител на истражувањето, посочува дека 2024 година бележи историски најнизок степен на употреба на фосилни горива за производство на струја во ЕУ.
Иако соларната енергија бележи значителен раст, Рослоу предупредува дека производствените капацитети за ветерна енергија лани се намалиле во споредба со 2023 година. „Ветерот и сончевата енергија се комплементарни, бидејќи произведуваат струја во различни периоди од денот и годината. Намалувањето на ветерната енергија не може целосно да се надомести со растот на соларната“, истакнува тој.
Една од позитивните вести во извештајот е порастот на побарувачката на електрична енергија во ЕУ за првпат по две години. И покрај тоа, потрошувачката сè уште е за 5% помала отколку во 2019 година.
ИЗВОР: racin.mk
