Денешниот земјотрес со јачина од 5,2 степени според Рихтеровата скала се случи три недели од првичниот земјотрес со јачина од 7,8 степени кој ги погоди Турција и Сирија на 6 февруари, а во кој загинаа над 50 000 луѓе
Во земјотресот што денеска ја потресе југоисточна Турција загина најмалкку едно лице, а 110 се повредени, соопштија турските власти, пренесе Ројтерс. Во потресот се урнаа и 29 згради.
Европско-медитеранскиот сеизмолошки центар (ЕМСЦ) соопшти дека земјотресот што ја погоди југоисточната провинција Малатија бил со јачина од 5,2 степени според Рихтеровата скала, а на длабочина од пет километри.
Денешниот земјотрес се случи три недели од првичниот земјотрес со јачина од 7,8 степени според Рихтеровата скала кој ги погоди Турција и Сирија на 6 февруари.
Директорот на Управа за управување со катастрофи и вонредни состојби во Турција, Орхан Татар изјави дека во изминатите три недели овој регион бил погоден од 45 последователни потреси со јачина меѓу пет и шест степени.
Како последица на разорниот земјотрес кој ги погоди Турција и Сирија на 6 февруари загинаа над 50 000 луѓе.
Извор: 360stepeni.mk
