Претставникот на коалицијата ВЛЕН, Арбер Кадриу, денеска изнесе сериозни обвинувања за коруптивни практики во Министерството за надворешни работи за време на мандатот на поранешниот министер Бујар Османи.
Според Кадриу, договорот за изнајмување возила за потребите на Советот на министри на ОБСЕ во декември 2023 година е пример за класична злоупотреба на јавни пари. Контрактот изнесувал 56,64 милиони денари за само два дена активности, без механизми за контрола и без доказ за бројот на навистина користени возила.
„Државата платила и до трипати поскапо за исти возила од истата компанија во ист временски период. Ова не е административна грешка, туку системска корупција,“ рече Кадриу.
Тој нагласи дека Државниот завод за ревизија веќе констатирал неправилности во постапката, додавајќи дека не постоел записник, комисија за прием или транспарентни критериуми за избор на операторот.
„Го прашуваме јавно Бујар Османи: кој го потврдил бројот на возилата и реализацијата на договорот? Зошто цените биле астрономски? Кој профитирал од оваа шема?“ рече Кадриу, барајќи отворање на истрага за сите инволвирани и целосна проверка на сите јавни набавки во МНР во мандатот на Османи.
„Ова е вистинското лице на политичката корупција. Овој модел мора да запре. ВЛЕН ќе продолжи да ја открива вистината и да се бори за чесно и транспарентно управување со парите на граѓаните,“ заврши Кадриу.
