Град Скопје оваа година во Програмата за заштита на животната средина вклучи само една мерка за зачувување на квалитетот на воздухот – бесплатен јавен превоз при високо ниво на загаденост и кога Владата активира мерки за заштита на граѓаните. И покрај ова, буџетот за 2024 година предвидува намалени средства за еколошка заштита. Новата влада со ребалансот на буџетот средствата планирани заМинистерството за животна средина и просторно планирање (МЖСПП) ги намали од 50 милиони на 35 милиони денари на нивото на целата држава.
Советниците од „Зелен хуман град“ повеќепати предлагаа краткорочни и среднорочни мерки за намалување на загадувањето, но и покрај усвоените предлози, Градот ретко ги спроведуваше. За да укаже на сериозноста на проблемот, советникот Горјан Јовановски дури се појави со гас-маска на една од седниците.
Последниот предлог од јуни, кој беше прифатен од советниците, вклучуваше 19 препораки изработени на првото Климатско собрание на Скопје. Градските служби треба да изготват план за имплементација на препораките, вклучително и временски рокови и финансиски извори, но досега нема постигнато видливи резултати.
Мерките во оваа иницијатива опфаќаат редовно чистење на улиците, зголемување на зелените површини и одржување на постојното зеленило според потребите на граѓаните и локалните услови.
Загадувањето на воздухот резултира со илјадници смртни случаи годишно, и за да се подобри состојбата, потребни се построги мерки за контрола на индустријата, замена на старите системи за греење со инвертери и подобра еколошка одговорност.
Во изминатиов викенд гореа и диви депонии во Визбегово и тоа на пет локации, а на терен дејствуваа инспектори на Град Скопје, пожарникарите и екипи на неколку јавни претпријатија. Како што тврдат од Град Скопје, само во текот на викендот скопските инспектори за животна средина и комуналните инспектори изрекле казни на повеќе од 25 сторители.
Истражувањата на УНДП и Универзитетот „Гоце Делчев“ посочуваат дека домаќинствата и јавните објекти што користат фосилни горива се главни загадувачи, додека „Шанса за Центар“ мапираше околу 700 јавни објекти кои користат нафта и мазут за греење, меѓу кои се болници, училишта и градинки во Скопје.
Министерот за здравство Арбен Таравари најави нов проект за намалување на загадувањето преку замена на системите за греење во болниците, додека министерот за животна средина Изет Меџити истакна дека загадувањето е приоритет и дека е во тек акционен план, вклучувајќи повторен обид за гасификација на урбаните центри.
Во Скопје се поставени само пет државни мерни станици и една мобилна за следење на квалитетот на воздухот, но некои од нив не секогаш функционираат правилно или мерат само одредени честички. Во моментот, на „IQAir“ платформата, Скопје варира помеѓу 4-то и 15-то место на листата на најзагадени градови во светот.
ИЗВОР: racin.mk
