Владата се пофали дека го реши хаосот со градскиот превоз. На вонредна седница е донесена одлука за кризна состојба со топлинска енергија во Градот Скопје, што ќе овозможи да бидат позајмени дел од државните нафтени резерви. Дополнително, одлучено е и Град Скопје повеќе да не распишува тендер за гориво, туку да може да преговара со компаниите.
„Бирото за јавни набавки донесе одлука со која се исполнети условите за спроведување на постапка со преговарање, без објавување на оглас, за да се скрати периодот за набавка на дериватот потребен на Градот Скопје. Со ова Владата го затвора прашањето со настанатата потешкотија“, вели Венера Азизи.
Град Скопје ја поздрави владината одлука.
„Ја поздравуваме одлуката на Владата со која конечно се докажа дека секогаш е подобро политика да се води со разум, а не со инает и дека доколку јавниот интерес е на прво место можно е конструктивно да се делува во интерес на граѓаните. Потсетуваме дека Владата се уште има долг од 500 милиони денари кон ЈСП Скопје за студентскиот стандард и бесплатниот студентски превоз, со кои ќе се стабилизира во целост состојбата во претпријатието.“, вели Град Скопје.
Инаку, автобуските линии и денеска беа редуцирани, а дел од учениците изутринава едвај стигнале во училиштата.
„Состојбата е многу лоша и срамота е во главниот град на Македонија во суштина да им се оневозможи правото на учениците да добијат соодветно образование.“, вели Весна Јаневска.
Претходно Град Скопје обвини дека зад хаосот стои, како што соопштија, суетата на премиерот Христијан Мицкоски, кој преку кадрите во Бирото за јавни набавки смислено го поништил нивниот тендер за набавка на гориво. Од Бирото одговорија дека нивната одлука е исправна, зашто ЈСП избрало неприфатлива понуда како најповолна, а Градот Скопје ширел потикантство. Градоначалничката Арсовска во интервју за Телма изјави како небулозно го оценува образложението на Бирото за јавни набавки и вели дека не може да се зборува за подобра или полоша понуда за набавка на гориво, во ситуација кога цената е регулирана од страна Регулаторната комисија за енергетика. Во однос на тендерите на ЈСП за мазут се вклучи и Обвинителството преку Управата за финансиска полиција.
ИЗВОР: ТВ 21
