ПАРИЗ (АА) – Француската Влада нема да ја повлече контроверзната пензиска реформа и покрај штрајковите, масовните протести и насилството во голем број градови во земјата, известува Анадолу.
Портпаролот на француската Влада, Оливие Веран, за францускиот весник „Журнал ди диманш“ изјави дека нема да ја повлечат реформата дури и ако тоа предизвика нови протести.
„Не можеме да дозволиме да се оправда идејата дека насилството е праведна или толерантна реакција“, рече Веран.
Тој истакна дека во иднина во Франција ќе има и други реформи.
„Меѓу идните реформи некои ќе бидат непожелни, но ќе има и реформи што ќе ги одобри Парламентот и се неопходни за иднината на земјата“, истакна Веран.
Франција се соочува со постојани демонстрации од 16 март, кога претседателот Емануел Макрон и премиерката Елизабет Борн одлучија да ги искористат уставните овластувања за усвојување на Законот за пензиски реформи без согласност на Парламентот.
Во текот на овие протести дојде до насилство и вандализам.
Со реформите се предвидува зголемување на старосната граница за заминување во пензија од 62 на 64 години, како и најмалку 43 години работа за да се оствари правото на целосна пензија. Планот предизвика гнев во јавноста откако беше објавен минатата година, со масовни протести и штрајкови низ целата земја од јануари.
Претходниот ден во демонстрациите низ Франција се приведени 457 лица.
Извор: www.aa.com.tr
