(ВИДЕО) Сомалија ја има најбавната „атлетичарка“ – ја испратиле на игрите зашто е внука на претседателката на федерацијата?

Министерот за спорт ѝ се извини на јавноста и рече дека ова е срам, а од Министерството соопштија дека ја суспендирале претседателката на атлетската федерација и најавија истрага

Видео од настапот на 20-годишна натпреварувачка од Сомалија на Светските универзитетски игри во Кина е хит на интернет поради бавното и непрофесионално трчање.

Станува збор за „атлетичарката“ Насра Али Абукар која ја претставуваше државата на трка на 100 метри иако не е професионална спортистка и трчаше како и секој обичен рекреативец. Патеката ја помина за дури 21,81 секунди, што е речиси двојно повеќе од девојката што победи, а дури осум секунди подолго од „атлетичарката“ која се пласираше како претпоследна.

За срамот на Сомалија да биде уште поголем, се воспостави дека во прашање е скандал поврзан со непотизам.

Имено, според пишувања на медиумите, натпреварувачката Насра Али Абукар е внука на претседателката на атлетската федерација на Сомалија, Кадиџо Адех Дахир.

Ова беше откриено откако јавноста во Сомалија бурно реагираше и бараше оставки во Министерството за млади и спорт, а Асоцијацијата на сомалиските универзитети соопшти дека таа не назначила ниту еден спортист да се натпреварува на настанот.

Се огласи и лично министерот за спорт Мохамед Баре Мохамуд кој го опиша настанот како срам.

„Она што се случи не беше претставување на сомалискиот народ, му се извинуваме на сомалискиот народ“,

рече министерот.

Министерството најави истрага, а по состанокот со Националниот олимписки комитет, соопшти дека ја суспендира претседателката на атлетската федерација поради непотизам и злоупотреба на моќта иако во официјалното соопштение не е наведена конкретната роднинска врска.