Во Брисел утре состанок на министрите за надворешни работи на НАТО – Муцунски на иста маса со американскиот државен секретар Марко Рубио, од МНР нема потврда за билатерална средба.
Во време на трговска војна меѓу ЕУ и САД, неусогласеност меѓу Европејците и Американците на глобалната сцена и војна во Украина – Марко Рубио денеска пристигнува во Брисел, на дводневен состанок, со шефовите на дипломатии на членките на Воената Алијанса. Според најавите, фокусот на НАТО состанокот ќе биде зголемување на трошоците за одбрана на сојузниците и продолжување на поддршката за Украина. Во Брисел ќе присуствуваат и украинскиот министер за надворешни работи Сибига и високата претставничка на ЕУ за надворешна политика и безбедност Каја Калас.
Шефот на дипломатијата Муцунски, од денеска веќе е во посета на Брисел. Според нашите информации тој веќе имал средба и затворени брифинзи со осум тинк-тенк организации, на тема- деблокада на македонските интеграции. Сепак, од МНР, нема ниту потврда, ниту негирање дали Муцунски ќе има средба со американскиот државен секретар Рубио, па дури и во формат на маргините во Брисел. На состанокот ќе учествуваат 32 земји-членки на НАТО, но засега нема информации ниту дали Муцунски ќе има средба со некој од министрите, но и со шефицата на европската дипломатија Каја Калас.
Македонската влада во изминатиот период порачува дека ќе ја користи секоја прилика за да побара поддршка и да ги презентира аргументите,за деблокада на евроинтеграциите. И премиерот Мицкоски, за време на последната посета на САД, на социјалните мрежи напиша – Имаме идеја, имаме план, Македонија има пријатели.
Извор: 24vesti.mk
