Градоначалникот на Ѓорче Петров Александар Стојкоски денеска беше во посета на подрачното основно училиште „Димитар Поп Георгиев – Беровски”, каде конечно после долг период и голем број пречки привршуваат со градба и се финализираат новите капацитети кои ќе овозможат одлични услови за учениците од ова училиште.
– Со доградбата на новото крило во склоп на училиштето ќе се добијат нови 6 училници, постоечките капацитети се зголемени и преуредени, односно новите услови ќе овозможат зголемен број на ученици кои ќе можат да посетуваат настава. Дополнително ќе се работи на уредување на просторот околу училиштето во делот на хортикултурата и урбаната опрема, порача Стојкоски.
Вели дека овој проект е од огромна важност за жителите на Хром, поради тоа што неколку години дечињата кои што учат во ова училиште беа приморани да учат во услови кои не беа соодветни на нивните реални потреби.
– Наша должност и обврска е да се грижиме за нашите најмлади жители, односно дечињата. Здрава и едуцирана младина, создава здраво и перспективно општество. Продолжуваме посветено за урбано Ѓорче, дециден е првиот човек на оваа скопска општина.
ИЗВОР: skopjeinfo.mk
