Граѓаните на Кочани денеска излегоа на протест, барајќи правда и одговорност за трагедијата во дискотеката, во која загинаа најмалку 59 лица.
Гневот и болката се чувствуваа низ насобраната толпа, а многумина го искажаа својот револт против надлежните институции. Според извештаите од терен, на две лица им се слошило за време на протестот, по што им била укажана помош од Црвениот крст.
-Убијци, убијци! Секој еден може да е следен! Сакаме правда!, извикуваа граѓаните на протестот.
Истовремено, граѓаните во долги редици чекаат да се потпишат во книгата на жалост, споделувајќи ја тагата за загубените животи.
Денешниот апел е да бидеме помасовни, побројни и да не молчиме, бидејќи со молчењето стигнавме до овде,“ изјави Стојан Рашков, фотограф и учесник на протестот во Кочани.
Тој посочи дека корупцијата ги надминала сите граници и дека е втемелена во секој сегмент од општеството.
„Корупцијата ни убива секој ден. Мораме што побргу да се пресметаме со неа, бидејќи таа не убива,“ нагласи Рашков.
Во однос на одговорноста на институциите, тој беше скептичен:
„Не очекувам многу од надлежните, бидејќи и во претходни случаи каде што имаше трагедии, не видовме вистинска правда. Сепак, ја поздравувам оставката на градоначалникот, кој се одважи да го направи првиот чекор. Но, надлежните имаат многу работа, бидејќи системот е скапан и пред лицето на правдата треба да излезат многу општествени чинители.“
„Апелирам сите да бидеме посвесни за тоа што се случува и што правиме. Не смееме да се потпираме на подмитување и врски, бидејќи гледаме до каде нè доведоа тие работи,“ изјави Гордана Иванова, учесничка на протестот во Кочани.
Таа нагласи дека корупцијата одамна ги надминала сите граници и дека трагедијата што се случи е доказ за тоа.
„Најжалното од сè е што ова не е првпат. Немам зборови…“
Иванова изрази разочараност од институциите и нивната долготрајна нефункционалност:
„Што да очекуваме како мерки, кога сето ова се влече со децении? Оваа дискотека постои 20 години, а секогаш сум велела дека не личи на место за забава. Тоа не беше простор за живеење, а камоли за собирање на повеќе од 500 луѓе.“
ИЗВОР: racin.mk
