ГАЗА (АА) – Членови на семејството на Исмаил Ханије, шеф на групата Хамас, вклучително и неговата сестра, се убиени денес во израелски воздушен напад врз нивниот дом во западниот град Газа, јавува Анадолу.
Според медицински извори, најмалку 10 лица од семејството Ханије биле убиени во израелскиот воздушен напад врз нивниот дом во бегалскиот камп на брегот, во западниот дел на градот Газа.
На 10 април Ханије изгуби тројца од своите синови во израелскиот воздушен напад врз нивниот автомобил.
Други израелски воздушни напади беа насочени кон две училишта што се користат како засолништа во населбата Ал-Дараџ, во источниот дел на градот Газа и во бегалскиот камп на брегот, и има голем број жртви.
Здравствените власти допрва ќе ги потврдуваат бројките на загинатите и повредените лица.
Во меѓувреме, тимовите за цивилна одбрана во бегалскиот камп Ал-Магази, во централниот дел на Појасот Газа, извадија пет тела, меѓу кои три деца, една жена и еден маж од под урнатините на домот уништен од израелски воздушен напад.
Прекршувајќи ја Резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради континуираната брутална офанзива врз Појасот Газа со неселективно бомбардирање на цивилни населби, училишта, верски објекти и болници, започната по нападот на палестинската група на отпорот Хамас на 7 октомври минатата година.
Според локалните здравствени власти, оттогаш во Појасот Газа се убиени повеќе од 37.600 Палестинци, повеќето жени и деца, а околу 86.100 се ранети.
Повеќе од осум месеци по почетокот на израелските напади големи делови од Појасот Газа се во урнатини.
Израел е обвинет за геноцид пред Меѓународниот суд на правдата, чија последна одлука им нареди на израелските власти веднаш да ја прекинат воената операција во јужниот град Рафа.
И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.
Извор: Anadolu Agency (AA)
