ЖЕНЕВА (АА) – Турскиот министер за труд Ведат Ишикхан истакна дека економијата и пазарот на трудот во Газа доживеаја колапс поради тековните непријателства на Израел во опколениот појас, јавува Анадолу.
Министерот имаше обраќање на специјалната седница посветена на состојбата на работниците од окупираните арапски територии што се одржа во Женева како дел од 112. Меѓународна конференција на трудот.
„Економијата и пазарот на труд во Газа доживеаја колапс со широко распространетата невработеност и уништувањето на инфраструктурата“, рече Ишикхан, нарекувајќи ја тековната војна „најбруталниот масакр во човечката историја“.
Тој изрази жалење за „недејствувањето“ на меѓународната заедница, опишувајќи го како „јасен показател за неуспехот на меѓународниот систем“.
„Ќе биде невозможно да се зборува за човекови права, права на трудот и хуманост доколку Израел не биде запрен“, рече тој и ги повика работничките и меѓународните организации да упатат силен повик за итен прекин на огнот и хуманитарна помош.
Турскиот министер ги повика Меѓународната организација на трудот и сите нации да преземат итни мерки, да стават крај на човечката трагедија и да застанат со народот на Палестина.
Израел ја продолжи својата брутална офанзива врз Газа по нападот на Хамас на 7 октомври и покрај Резолуцијата на Советот за безбедност на ОН со која се бара итен прекин на огнот.
Според локалните здравствени власти, оттогаш во Газа се убиени речиси 36.600 Палестинци, огромно мнозинство се жени и деца, а над 83.000 се повредени.
По речиси осум месеци од почетокот на израелските напади огромни делови од Газа се во урнатини, а недостигаат храна, чиста вода и лекови.
Израел е обвинет за геноцид пред Меѓународниот суд на правдата (МСП), кој во својата последна одлука му нареди на Тел Авив веднаш да ја прекине операцијата во Рафа, каде што засолниште од војната побараа повеќе од еден милион Палестинци.
Извор: Anadolu Agency (AA)
