ИСТАНБУЛ (АА) – Министерот за национална одбрана на Туркије, Јашар Ѓулер, соопшти дека Турските безбедносни сили неутрализирале 59 припадници на терористичката организација ПКК во Северен Ирак и Сирија, близу турската граница, пренесува Анадолу.
„Извршивме воздушни операции на 71 позиција во Северен Ирак и Сирија, и неутрализиравме 59 терористи преку операции, судири и други начини“, се вели во соопштението на Министерството објавено на платформата X.
Турските власти го користат терминот „неутрализирање“ за да имплицираат дека терористите се предале или биле убиени или заробени.
„Како што секогаш изјавувавме, нашата борба против тероризмот ќе продолжи сѐ додека не се неутрализира и последниот терорист“, рече Ѓулер.
Откако во терористичкиот напад на ПКК минатиот петок загинаа 12 војници, во воздушните напади на турските сили уништени се десетици терористички позиции во Северен Ирак и Сирија.
Во саботата, турскиот претседател Реџеп Таип Ердоган вети дека Туркије по секоја цена ќе спречи појава на терористичка структура во Северен Ирак и Сирија, долж границите со Туркије.
Терористите на ПКК често се кријат во северен Ирак каде планираат прекугранични напади во Туркије. Терористичката организација има и сириски огранок, познат како ЈПГ.
Во својата повеќе од 35-годишна терористичка кампања против Туркије, ПКК, која се наоѓа на листата на терористички организации на Туркије, САД и ЕУ, е одговорна за смртта на повеќе од 40.000 луѓе, меѓу кои и жени, деца и бебиња.
Извор: www.aa.com.tr
