Турскиот министер за надворешни работи, Хакан Фидан, денес изјави дека Анкара ќе продолжи да стои покрај сирискиот народ и да ги поддржува неговите легитимни аспирации и волја, јавува Анадолу.
„За време на секоја моја посета, лично го набљудувам прогресот што го постигна Сирија во многу области“, истакна Фидан преку X за неговата посета на Сирија, посочувајќи дека ова е негова трета посета на Дамаск за деветте месеци од падот на режимот на Башар ал-Асад.
Тој рече дека под водство на турскиот претседател Реџеп Таип Ердоган и сирискиот претседател Ахмед ал-Шара „ние сме решени да ја продлабочиме соработката во сите области“.
На средбата со Ал-Шара, Фидан рече дека разговарале за широк спектар прашања, меѓу кои и трговијата, инвестициите, транспортот и енергетиката.
– Турција стои покрај Сирија во нејзината борба против терористичките организации –
Фидан истакна дека ги разгледале чекорите што би можеле да се преземат на билатерално и регионално ниво за обнова на Сирија.
„Особено се фокусиравме на безбедносните прашања и се концентриравме на внатрешните и надворешните закани за суверенитетот и политичкото единство на Сирија“, рече тој, додавајќи дека „како Турција, ќе продолжиме да ја поддржуваме Сирија во нејзината борба против терористичките организации“.
Турскиот министер, исто така, повтори дека Турција е подготвена да ѝ ја обезбеди потребната помош на сириската Влада во преземањето на одговорностите поврзани со управувањето и безбедноста на камповите во североисточна Сирија.
Тој додаде дека на состаноците станало збор и за израелските активности против Сирија.
Турскиот министер за надворешни работи истакна дека сирискиот народ сака да ја искористи историската можност и да изгради подобра иднина, и рече дека сириската Влада истовремено се соочува со многу предизвици за да ја направи земјата побезбедна, стабилна и просперитетна.
Фидан ја нагласи важноста на меѓународната поддршка, особено од САД и европските земји, за надминување на овие предизвици.
„Израел води политика што го дестабилизира нашиот регион“, рече тој, истакнувајќи дека спречувањето на ова е „заедничка одговорност на меѓународната заедница“.
Извор: Anadolu Agency (AA)
