АНКАРА (АА) – Туркије во мај привлече 4,5 милиони странски посетители, што е за 16,2 отсто повеќе од претходната година, објави денес турското Министерство за култура и туризам, јавува Анадолу.
Познатиот туристички град Анталија е најпосетен град со 33,6 отсто од вкупниот број странски посетители, при што минатиот месец се пречекани 1,51 милион странци.
Истанбул, најголемиот град во Туркије по население и популарна туристичка дестинација, се најде на второ место, со 1,5 милион странски посетители во мај.
Егејската област Мугла ја посетиле 380.899 странски посетители, додека северозападната област Едрене, која граничи и со Бугарија и со Грција, ја посетиле 349.123 странски посетители.
На врвот на листата на посетители по земји се најде Русија со 640.844, потоа Германија со 617.617 и Британија со 452.724.
– Кумулативна бројка –
Во периодот јануари-мај пристигнувањето на странски туристи во Туркије се зголеми за 23,7 отсто во однос на претходната година и надмина 14 милиони.
Русите го сочинуваат најголемиот дел од странските посетители во првите пет месеци од оваа година со 1,8 милиони, што е повеќе од двојно зголемено во споредба со пред една година.
По нив следуваат Бугарите со 1,06 милиони посетители, Британците со 982.267 и Иранците со 794.177 во првите шест месеци од 2022 година.
Истанбул го посетиле 44,7 отсто од вкупниот број странски посетители или 6,3 милиони во петмесечниот период. Анталија го зазеде второто место со 22,40 отсто или 3,1 милиони туристи. Потоа следува Едрене со 1,5 милиони посетители или 10,5 отсто.
– Туркије има цел оваа година да привлече 60 милиони странски туристи –
Туркије има цел да привлече 60 милиони странски туристи и да генерира приход од 56 милијарди долари во 2023 година, изјави турскиот министер за култура и туризам.
Во 2022 година околу 44,6 милиони странски туристи ја посетиле Туркије, што претставува пораст од 80,3 отсто во однос на претходната година.
Според податоците на Турскиот статистички институт (TurkStat), минатата година земјата има остварено приход од туризмот од 46,3 милијарди долари, во споредба со остварените 38,9 милијарди долари во 2019 година, периодот пред епидемијата.
Извор: www.aa.com.tr
