ИСТАНБУЛ (АА) – Делегациите на Туркије и Ерменија денес „повторно нагласија“ дека треба да се продолжи процесот на нормализација меѓу нивните земји „без никакви предуслови“, јавува Анадолу.
„Тие повторно ја нагласија својата согласност за продолжување на процесот на нормализација без никакви предуслови за постигнување на крајната цел за целосна нормализација меѓу нивните земји“, се вели во соопштението на турското Министерство за надворешни работи.
Сердар Килич, специјалниот претставник на Туркије за процесот на нормализација меѓу двете земји, и Рубен Рубинјан, заменик-претседател на ерменскиот Парламент, ја одржаа својата петта средба на граничниот премин Аликан – Маргара меѓу Туркије и Ерменија.
„Тие ги потврдија договорите постигнати на нивните претходни состаноци“, се вели во соопштението.
Во него се додава дека двете страни се согласиле да ги оценат техничките барања за да се овозможи функционирање на железничкиот граничен премин Акјака/Ахурик, во согласност со регионалните случувања, како и да ги поедностават нивните меѓусебни визни процедури за оние кои имаат дипломатски и службени пасоши.
Туркије и Ерменија започнаа разговори за нормализирање на односите во јануари 2022 година, а преговорите најпрво се одржаа во руската престолнина Москва.
Оттогаш, специјалните претставници на Анкара и Ереван се состанаа уште три пати во австриската престолнина Виена, а последната средба се одржа во јули 2022 година.
Извор: Anadolu Agency (AA)
