ТИРАНА (АА) – Туркије и Албанија потпишаа четири договори во областа на соработката, комуникациите, образованието и земјоделството, јавува Анадолу.
Пред одржувањето на заедничката прес-конференција, во присуство на претседателот Реџеп Таип Ердоган и албанскиот премиер Еди Рама беа потпишани договорите меѓу двете земји.
Претседателот Ердоган и албанскиот премиер Рама потпишаа Заедничка декларација за продлабочување на стратешкото партнерство кое е воспоставено со формирањето на Советот за соработка на високо ниво меѓу Владата на Република Туркије и Владата на Република Албанија.
Меморандумот за соработка во областа на односите со јавноста и комуникацијата меѓу Туркије и Албанија беше потпишан од страна на директорот за комуникации во Кабинетот на претседателот, Фахретин Алтун, и генералниот директор на Агенцијата за медиуми и информации на Република Албанија, Алтео Хуси.
Декларацијата за намера за соработка меѓу Министерството за земјоделство и шумарство на Република Туркије и Министерството за земјоделство и рурален развој на Република Албанија што се однесува на соработката во областа на земјоделското осигурување поддржано од државата го потпишаа турскиот министер за земјоделство и шумарство Ибрахим Јумакли и министерката за земјоделство и рурален развој на Албанија Анила Денај.
Протоколот меѓу Министерството за образование и спорт на Република Албанија и Претседателството на Советот за високо образование на Република Туркије со кој Техничкиот универзитет Истанбул ќе отвори академски филијали и програми во Албанија го потпишаа претседателот на Советот за високо образование, проф. д-р Ерол Озвар, и министерката за образование и спорт на Република Албанија, Огерта Манастирли.
Извор: Anadolu Agency (AA)
