ИСТАНБУЛ (АА) – Претседателот на Туркије, Реџеп Таип Ердоган, денес изјави дека неговата земја од почетокот на израелските напади на Појасот Газа досега со авиони и бродови испратиле околу 40.000 тони помош во палестинската енклава, известува Анадолу.
„Се очекува уште еден брод на турската Црвена полумесечина со 3.000 тони помош во недела да стигне до египетското пристаниште Ал-Ариш“, рече Ердоган на состанокот на Генералното собрание на Истанбулската фондација за ширење на знаење.
Најавувајќи дополнително зголемување на помошта за палестинскиот народ во текот на претстојниот месец на постот Рамазан, Ердоган рече дека Туркије и нејзиниот народ недвојбено најмногу се грижат за палестинското прашање.
Истакнувајќи дека во директните израелски напади врз цивилите во Појасот Газа досега се убиени повеќе од 32.000 Палестинци, а ранети се над 72.000, претседателот на Туркије рече дека случувањата во Газа од 7 октомври досега го надминале секој праг на толеранција.
Ердоган додаде дека Туркије одлучно се залага масовните убијци, на кои веќе им суди совеста на човештвото, да бидат процесуирани и изведени пред меѓународните судови.
„Со злосторствата против човештвото во Газа, Нетанјаху и неговата администрација ги додадоа своите имиња на листата на нацисти на денешнината покрај Хитлер, Мусолини и Стаљин“, рече Ердоган.
Претседателот на Туркије изрази и жалење поради неуспехот на исламскиот свет, со популација од околу 2 милијарди, што не е во состојба во потполност да ја исполни својата должност на вистинско братство кон палестинскиот народ.
Извор: Anadolu Agency (AA)
