АДАНА (АА) – Болничките соби во јужна Туркије се полни со играчки за децата кои минатата недела преживеаја два земјотреси, јавува Анадолу.
Лекарите волонтери во Адана се обидуваат да ги излекуваат децата не само со медицински интервенции туку и со психолошка поддршка.
Серафетин Демир, лекар во градската болница во Адана, на социјалните мрежи започна кампања за собирање играчки, која привлече големо внимание.
„Сакавме малку да ги оддалечиме нашите деца од болничкото опкружување. Можеби нема да можеме да им ја намалиме болката, но ќе бидеме многу среќни ако малку заборават“, вели Демир.
Како што рече тој, во болницата пристигнале балони, кукли и разни други играчки. Среќата на децата го подигна и моралот на лекарите кои работеа со нив.
Најмалку 36.187 луѓе загинаа во двата силни земјотреси што ја потресоа јужна Туркије на 6 февруари.
Земјотреси со јачина од 7,7 и 7,6 степени според Рихтеровата скала, со епицентар во областа Кахраманмараш, погодија 11 области населени со над 13 милиони луѓе, уништувајќи илјадници згради.
Во моментов на терен работат повеќе од 253.000 члена на тимовите за пребарување и спасување. Вкупно 216.347 лица се евакуирани од регионите во Туркије погодени од земјотресот.
Извор: www.aa.com.tr
