Десетици загинати и исчезнати е билансот од поплавите што изминатите денови зафатија неколку земји во Европа. Бурата Борис во делови од Австрија, Чешка, Унгарија, Полска, Романија и Словачка поплави цели населби и принуди стотици илјади луѓе да се евакуираат.
Во некои области врнежите се намалуваат, но во други нивото на водата се очекува да го достигне врвот во наредните денови. Надојдениот Дунав стигна до Словачка, а за поплави се подготвуваат и во Унгарија, особено во Будимпешта, каде што армијата е веќе на терен. Словачкиот министер за животна средина Томаш Тараба вели дека нивото на водата на Дунав во текот на ноќта достигнало близу 10 метри и дека нема така лесно да се спушти.
Тој рече дека штетите од поплавите низ државата се проценуваат на околу 20 милиони евра. Во Полска градоначалникот на Вроцлав, Јацек Сутрик, рече дека автобусите биле подготвени за евакуација.
„Дополнително ќе ги зајакнеме насипите во сливот на реката Одра која се очекува да го достигне врвот в петок или можеби порано.“ – изјави Јацек Сутрик градоначалник на Вроцлав.
Во градовите Вишеград и Сентендре, северно од Будимпешта, властите поставија мобилни брани за да ги ограничат поплавите од Дунав. Будимпешта се подготвува за рекордно ниво на вода и го затвори островот Маргарет, одморалиште со хотели и ресторани.
Извор: 24vesti.mk
