Цел ден исчекување кого ќе предложи претседателката Гордана Сиљановска Давкова за нов гувернер на Народната Банка. Иако уште утрово најави дека името е познато и дека него треба да го објави Собранието, до кого по Закон се доставува предлогот, само неколку часа подоцна, Претседателката иако го повтори ставот дека името се знае, дополни и дека до нејзиното заминување на службен пат документот ќе се допрецизира.
„Денеска ќе биде финализирано пред да заминам за Италија“, вели Гордана Сиљановска Давкова.
Ова беше кажано пред да се најави средбата со премиерот Христијан Мицкоски, кој отиде во резиденцијата на Претседателката за да го дознае името кое ќе се предложи до Собранието. Мицкоски тврдеше дека се до средбата, не знаел кој ќе е предложен од тројцата кандидати кои беа споменувани во јавноста.
„Јас ги знам имињата на кандидатите кои што беа на разговор со претседателката и за сите тие имам свое лично мислење. “, вели Христијан Мицкоски.
Претседателката во неделата имаше консултации со актуелната гувернерка Анита Ангеловска Бежоска, како и со поранешните министри за финансии од редовите на ВМРО ДПМНЕ Зоран Ставревски и Трајко Славески, кој во моментов е и претседавач на Советот на Град Скопје. Според Законот, нема никакви пречки до денот на стапување на функција, идниот гувернер да бил политички активен.
„Законот не дозволува додека сте на функција, така вели членот, додека сте на функција, да знаете дека функцијата е инкомпатибилна со партиско членство. Така вели законот. Не вели дека ако сте биле некогаш, ние сме имале извонреден гувернер Петар Гошев кој што бил претседател на партија. Значи, немало проблем во тоа. Меѓутоа работата е во тоа додека вие функционирате да заборавите на партиски влијанија и да се водите од предизвикот на професијата“., вели Гордана Сиљановска Давкова.
Иако според Уставот гувернерот го предлага Претседателот на државата, неговиот избор треба да биде во координација со владејачкото мнозинство бидејќи за избор се потребни само 61 пратеник или просто мнозинство.
Мандатот на актуелната гувернерка Бежоска истече вчера и ова прв пат во историјата на Македонија во законскиот рок да не се изгласа наследник. Но, според Законот, се до избор на нов или реизбор на постојниот, функцијата со потполни овластувања ја извршува Гувернерот чиј мандат е истечен.
ИЗВОР: ТВ 21
