Министерот за земјоделие Цветан Трипуновски вечерва беше гостин во „Наткаст“ со Љупчо Цветановски на КУРИР.
Тој беше дел од делегацијата со која премиерот изминативе денови беше во посета на Унгарија. Трипуновски оценува дека Орбан бил одличен домаќин и дека македонската делегација имала срдечен пречек.
Освен заедничка меѓувладина седница, македонските министри имале и низа средби со своите колеги во Будимшешта, каде разговараа за своите области.
-Со мојот колега имавме и билатерална средба и помали состаноци на кои разгиваравме околу она што не мачи околу земјоделското производство, предизвиците со кои се соочуваме. Посебно во делот на климатските промени, производство на храна. Договараме средба која треба да се случи за месец и половина од сега, една официјална посета на колегата во Скопје. Разговаравме за еден документ кој треба да го потпишеме со кој ќе се обврземе за взаемна помош, односно искористување на сите потенцијали кои ги има Министерството за рурален развој во Унгарија. Продлабочување на соработката и во делот на образованието, научните истражувања, достигнувања кои ги имаат направено. Тие се голема држава, развиено земјоделство, многу потенцијали. И во делот на науката заедно со Земјоделскиот институт да ги доближиме соработките, рече министерот.
Трипуновски објасни дека бенефитот ќе биде ние како држава она што е постигнато во делот на науката и земјоделството, да не ги повторуваме грешките кои ги направиле, да имаме олеснет патоказ.
-Ќе потпишеме меморандум за соработка, ќе ги дефинираме приоритетите кои ни се нас важни како држава од областа на земјоделството. Разговаравме и за трговската размена. Ние се бориме да обезбедиме пласман на нашите производи, да ги пласираме што е можно повеќе на европскиот пазар. Унгарија е добар пријател и мислам дека можеме и во тој дел да постигнеме многу со заедничко претставување на компаниите, производите, преработките, за да ги пласираме, рече Трипуновски.
Ваквите посети, оцени министерот имаат огромен ефект.
ИЗВОР: kurir.mk
