Триесет дена притвор за убиецот на скопјанецот кој беше застрелан кај Мавровка…вториот осомничен, кој неколку часа по убиството беше приведен е ослободен …Третиот осомничен, по кого трагаше полицијата, сам се предал и негирал одговорност во убиството …
„Постапувајќи по предлог на Основното јавно обвинителство Скопје, за определување мерка притвор против Е.К. од Скопје, осомничен за две кривични дела Убиство и Убиство во обид , како и едно кривично дело Неовластено изработување, држење, посредување и трговија со огнено оружје, а поврзано со вчерашното убиство на паркингот кај ТЦ Мавровка, по сослушување на осомничениот во присуство на неговиот бранител, донесе решение со кое го прифати предлогот и на осомничениот му определи мерка притвор во траење од 30 дена“, информираат од Кривичен суд.
Од ОЈО излегоа со детали за случајот…Осомничениот на паркингот позади Трговскиот центар „Мавровка“, со умисла и од користољубие го убил 58 годишниот скопјанец, по што од сопругата на жртвата, одзел торба со лаптоп и избегал со автомобил „ауди“ без регистарски ознаки…Набргу потоа ги пресретнала полиција по што почнала меѓусебна престрелка…
„Вториот осомничен го оставил цитроенот во Гази Баба и се качил во автомобилот „ауди“, по што продолжиле да се движат, но на улицата „Стојна Стефкова“ биле пресретнати од полициски службеници. Додека другото лице управувало, сега осомничениот излегол од совозачка врата и пукал, обидувајќи се да ги лиши од живот полицајците кои сакале да го запрат. Четворицата полициски службеници во самоодбрана испукале неколку предупредувачки проектили во воздух со службеното оружје, па го совладале и привеле осомничениот. Другото лице се дало во бегство и по него се трага“, велат од Основно јавно обвинителство.
Од МВР пак велат дека е расчистено убиството.
„СВР Скопје целосно ги расчисти кривичните дела „убиство” и „убиство во обид“, кои беа извршени на 20.08.2024 на паркинг просторот позади трговскиот центар Мавровка, каде што со употреба на огнено оружје беше убиен В.Е.(58) од Скопје и на ул.„Стојна Стефкова“, каде со пиштол беше пукано кон полициски службеници од Единицата за интервентна полиција при СВР Скопје“, , вели Панче Тошковски – Министер за внатрешни.
За неполна недела, две престрелки во Скопје. Пред неколку дена, и во населба „Ченто“ имаше вооружен напад кој за среќа мина без смртни последици.
Извор: 24vesti.mk
