Трамп го објави ова на социјалната мрежа Truth Social, наведувајќи дека за време на примирјето ќе бидат суспендирани сите борбени активности и ќе биде спроведена размена на 1.000 воени заробеници од секоја страна.
„Со задоволство објавувам дека ќе биде воспоставен ТРИДНЕВЕН прекин на огнот (9, 10 и 11 мај) во војната меѓу Русија и Украина“, напиша Трамп.
„Прекинот на огнот ќе вклучува прекин на сите борбени активности“
Тој додаде дека Денот на победата се слави во Русија, но и дека Украина била „голем дел и важен фактор во Втората светска војна“.
„Примирјето ќе вклучува прекин на сите борбени активности, како и размена на 1.000 затвореници од секоја земја“, напиша тој.
Трамп тврди дека барањето за примирје дошло директно од него и дека го цени тоа што го прифатиле рускиот претседател Владимир Путин и украинскиот претседател Володимир Зеленски.
„Ова е почеток на крајот на војната“
„Ова барање беше директно од мене и навистина го ценам тоа што беше прифатено од претседателот Владимир Путин и претседателот Володимир Зеленски“, рече тој.
Трамп изрази надеж дека ова е почеток на крајот на војната.
„Се надевам дека ова е почеток на крајот на многу долга, смртоносна и тешка војна. Преговорите за завршување на овој голем конфликт, најголемиот по Втората светска војна, сè уште се во тек и секој ден се приближуваме кон договор“, напиша американскиот претседател.
Досега нема официјална потврда од Москва или Киев за деталите за примирјето или размената на затвореници.
Извор: vecer.mk
