Трагедијата во Кочани ги разбуди и општинските инспектори: Се проверуваат и згради за домување

Општинските инспектори на терен, утре детален пресек за извршените контроли и безбедноста на објектите во општините. Покрај градинките, училиштата, домовите за култура, спортските сали-општините ќе ги проверуваат и објектите за домување дали исполнуваат услови за противпожарна заштита.

Претседателот на ЗЕЛС и градоначалник на општина Кисела Вода Орце Ѓорѓиевски посочи дека дел од општините редовно извршувале контроли изманатиот период, но имало и општини кои не си ги извршувале своите обврски.

„Јас жалам што не е секаде состојбата проверувана изминатите години и претпоставувам дека има општини, коишто можеби и од објективни причини не го направиле тоа. Кои се објективните причини и зошто тоа го споменав и на мојата прес-конференција, е делот на недоволно инспекциски служби. Во мојата општина, во строга контрола влегуваме и во стамбените згради-треба да има соодветна хидрантска мрежа, скали за пожар, да се исполнуваат елементарни услови.“ – Орце Ѓорѓиевски претседател на ЗЕЛС, градоначалник на Кисела Вода.

За недостатокот на инспектори во дел од општините Ѓорѓиевски вели дека заеднички ќе се надминува проблемот-инспектори од поголемите општини ќе одат онаму кадешто има потреба.

„Проблемот којшто го имаат најголемиот дел од општините особено помалите општини од внатрешноста е недоволниот број на инспекциски служби. Во многу од општините немаат инспектори за домување, немаат градежни инспекции, комунални инспектори, ние ќе треба заеднички да го решаваме тоа во наредниот период.“ – Орце Ѓорѓиевски претседател на ЗЕЛС, градоначалник на Кисела Вода.

И додека се вршат контролите, од Државниот инспекторат за транспорт денеска е соопштен новиот пресек, од извршени 138 контроли за три дена, се констатира 21 неправилност кај правни и физички лица при вршење на превоз на патници и стоки. За сите неправилности, како што велат од министерството, изречени се казни. Казна има и за  фирмата „Дурмо турс“, чијшто автобус учествуваше во несреќата која се случи близу селото Ласкарци, а во која загинаа 16 лица, а повеќе од 30 беа повредени.