Градоначалникот на Општина Пробиштип, Тони Тоневски, денеска се сретна со учениците прогласени за првенци на генерацијата во основните училишта од општината, упатувајќи им честитки за нивниот постигнат успех и посветеност во образованието.
На средбата, Тоневски истакна дека учениците Мартин и Петар со својот труд, знаење, дисциплина и истрајност покажале дека успехот се гради со упорна работа и одговорност.
– Вие сте гордост на своите семејства, на училиштата и на целата наша општина. Вашите резултати се доказ дека вложениот труд секогаш носи успех – порача градоначалникот.
Тој најави дека пред општинските советници ќе иницира измена на соодветните програми и правилници со цел да се овозможи доделување стипендии и за првенците на генерациите од основните училишта.
Според Тоневски, поддршката на младите и талентирани ученици претставува инвестиција во иднината и развојот на локалната заедница.
– Нашата цел е да ги мотивираме и поддржиме најдобрите ученици, бидејќи тие се иднината на Пробиштип и најголемата вредност што ја имаме – истакна тој.
На крајот од средбата, градоначалникот им честиташе на првенците и им посака многу успеси во понатамошното образование, нагласувајќи дека тие се пример и инспирација за генерациите што доаѓаат.
Извор: zurnal.mk
