Тензично беше изутрината (23.01.2024) пред ОУ „Тодор Јанев“ во Чашка, меѓу полицијата и родители што вчера и денес го продолжија протестот, почнат уште во првото полугодие, против воведување паралелка на албански јазик во училиштето.
Тензии имало и вчера, вели Цвета Пешевска, претседателка на Советот на родители во ОУ „Тодор Јанев“, за Радио Слободна Европа(РСЕ).
„Вчера (22.01) полицијата се обиде да направи кордон за да влезе в.д.директорката. Тука имаше реакција од граѓаните. Денеска повторно, преку кордон се обидоа да внесат наставници на што ние се спротиставивме. На една жена и се слоши. Дојде и Брза помош“, изјави Пешевска за РСЕ.
Според неа, на протестот има околу 30 жители на Чашка и уште толку полицајци.
Второто полугодие во ова училиште воопшто не почна.
„Не мрзневме два и пол месеци за сега да попуштиме. Поднесовме претставки секаде, се обративме до сите институции, никој не нѐ слуша ниту презема мерки“, вели Пешевска.
Советот на родители бара итна оставка на в.д.директорката Елена Николова. По оставката, според Пешевска, би разговарале да се најде решение за паралелката со албански јазик.
Советот на родители обвинува дека паралелката на албански е незаконски формирана, дека в.д. директорката е незаконски назначена и како што велат, дека таа продолжува незаконски да распишува огласи за вработувања.
РСЕ не успеа да добие став од в.д.директорката Николова.
Во ОУ „Тодор Јанев“ во Чашка нема настава од 22 ноември, кога родителите почнаа да протестираат, а учениците да губат часови. Но, проблемот почна од август 2023, кога Министерството за образование му ги одзеде ингеренциите врз училиштето на градоначалникот на Чашка, Горан Стојановски и Министерството за образование наложи да се отвори паралелка на албански јазик за неколку првачиња.
Според родителите Македонци – министерот за образование Јетон Шаќири насилно и притивзаконски сака да отвори албанска паралелка во училиште според чиј Статут наставата се одвива на македонски јазик, иако има и други училишта во околината во кои наставата е на албански јазик. Според Албанците, тие имаат уставно право да учат на мајчин јазик.
Советот на родители предложи наставата за првачињата на албански да се префрли во село Сливник, опција што Министерството за образование не ја прифати.
Извор: Радио Слободна Европа
