Во својата нова епизода од „Кардашијан“ риалити ѕвездата
Ким Кардашијан изјави дека и таа припаѓа на групата луѓе кои веруваат во една
од најпознатите теории на заговор за слетувањето на Месечината.
Имено, таа на снимањето на серијата „Сè е фер“ изјави
дека верува оти слетувањето на Месечината во 1969 година било лажно и дека
никогаш не се случило.
„Ти праќам милион статии со Баз Олдрин и… другиот“, ѝ
рече Ким на актерката Сара Полсон, мислејќи на Нил Армстронг.
„Мислам дека не го направивме тоа. Мислам дека беше
лажно. Видов неколку видеа од Баз Олдрин во кои вели дека тоа не се случило.
Тој постојано го кажува тоа“, рече Ким, додавајќи:
„Зошто се вее знамето ако нема гравитација на Месечината?
Чевлите во музејот имаат различен отисок од оној на фотографиите. И зошто нема
ѕвезди?“
Се огласи НАСА
По овие тврдења на ријалити ѕвезди и претприемачи, кои
имаа силен одѕив во јавноста, се огласи и НАСА.
Вршителот на должноста администратор на агенцијата, Шон
Дафи, јавно ѝ кажа на 45-годишната Ким Кардашијан дека астронаутите навистина
оделе по Месечината.
„Да, Ким Кардашијан, веќе сме биле на Месечината… 6
пати“, напиша Дафи на X Network заедно со клип од епизодата.
Во продолжение на објавата, тој ги сподели и
достигнувањата на агенцијата.
„И уште подобро: @NASAArtemis се враќа под водство на
@POTUS. Ја добивме последната вселенска трка и ќе ја добиеме и оваа“, додаде
Дафи, поканувајќи ја Ким Кардашијан во Вселенскиот центар Кенеди во Флорида,
главното место за лансирање на НАСА.
Еве ја вистината
за слетувањето на Месечината
Како што објави вистиномерот, Аполо е проект спроведен од
Американската Национална администрација за аеронаутика и вселена (НАСА) во
60-тите и 70-тите години, а во чии рамки луѓето слетаа на Месечината за прв
пат, според Енциклопедијата Британика. Вкупно 24 астронаути од Аполо ја
посетија Месечината, а 12 од нив одеа по нејзината површина. Астронаутот Нил
Армстронг и пилотот на лунарниот модул Едвин Баз Олдрин станаа првите луѓе што
слетаа на Месечината како дел од мисијата Аполо 11 на 20 јули 1969 година.
Овој историски настан е потврден со 8.400 јавно достапни
фотографии, илјадници часови видео снимки, неколку научни податоци и комплетни
транскрипти и аудио снимки од сите разговори на вселенскиот екипаж. Покрај тоа,
астронаутите донесоа 382 килограми лунарна карпа на Земјата, која беше
независно потврдена како лунарна од лаборатории низ целиот свет.
Извор: vecer.mk
