Судскиот совет на „тапет“ од ЕК – сериозна загриженост за надворешно влијание во работата

Нема напредок во зајакнувањето на независноста на судството и подобрување на правната рамка за заштита на основните права, ова е општата оценка на најновиот Извештај на Европската комисија во делот на судството. Во овој дел јасно стои дека судскиот систем на Македонија е помеѓу одредено и умерено ниво на подготовка, а особено се задржа на состојбите што се случија во Судскиот совет, прво оставката на Павлинка Црвенковска, а потоа и контроверзното разрешување на претседателката на ова тело Весна Дамева.

„Во ноември 2022 година, претседателот на Судскиот совет поднесе оставка во знак на протест против наводните обиди за несоодветно влијание од судството и бизнис заедницата. Новиот претседател, кој ја презеде функцијата во декември 2022 година, беше разрешен во април 2023 година преку контроверзна процедура, покренувајќи прашања за почитување на законите и процедурите“, се вели во Извештајот.

Препораката наведена во Извештајот упатува на тоа дека Судскиот совет треба да се залага за независноста на судиите.

„Судскиот совет треба да се залага за заштита на интегритетот и независноста на судиите и институциите и треба да се спротивстават на секое надворешно влијание. Усвојувањето на новата стратегија за реформи во судството доцни, кое треба да има за цел да ги подобри перформансите на институциите“, се додава во извештајот.

Претседателот на Судскиот совет Сашко Георгиев во интервју за Слободен печат вели дека проблемите во судството се бројни, но дека дополнително се влоши довербата во судството кај граѓаните по изгласувањето на измените на Кривичниот законик.

„Неодамнешните измени на Кривичниот закон, каде како последица застареа многу кривични предмети кои беа пред завршница, се одразуваат дополнително на недовербата во судството, особено што судството, не по своја волја и вина, стана заложник на политиката и мораше само законски да констатира застареност на предметите“, вели Сашко Георгиев.

ЕК во Извештајот нагласува дека постои сериозна загриженост за несоодветно надворешно влијание врз работата на Судскиот совет и судството, укажувајќи дека треба да се зголеми транспарентноста во процесот на одлучување во Судскиот совет. Во делот на независност и непристрасност, ЕК оценува дека Судскиот совет и Советот на Јавните обвинители, треба да дејствуваат решително за да ја промовираат и заштитат независноста, интегритетот и професионалноста на судиите и обвинителите.