Тенденцијата кон пораст на емиграцијата на високостручни кадри, како и научен подмладок од одделни факултети, доведува до промени во квалитетот на работната сила и намалувањето на нивото на човечкиот капитал и негативни ефекти во развојот на економијата. Околу 2 500 високообразовани кадри, во период 2013-2021г, мигрираат од државата. Од државната каса просечно се одвојувале по околу пет милијарди денари и 44,7 милијарди денари вкупно за анализираниот период, укажуваа извештајот на Државниот завод за ревизија. Студентите треба да се вклучат во креирањето на сите политики, за да се здржат во земјава кои потоа ќе бидат дел од различни сектори, оценуваат младите. Потпретседателот на Универзитетското студентско собрание за Тв 24 вели дека со ваков ангажман и младите ќе имаат чувство дека прават нешто за подобрување на нивната иднина и за помрднување на работите од „мртва точка“. Најголемата демотивација за младите се наместени конкурси, апликации, непотизам и партизација.
„За да бидеме сигурни дека работите би се помрднале од мртва точка, кога ќе вклучат млади од било кој студентски форум или млади активисти, во тој момент ќе знаеме дека ќе работат за подобрување, а не само поставување на позиции за политики за млади преку било кој основ, непотизам, партиски..сите тие начини кога ќе се искоренат,кои за жал, ден денеска се случуваат.. Ако се смени сето тоа, ќе има промени, во најмала рака ќе се чувствува дека правиме нешто за да има промени“, вели Александар Ристоски-потпретседател на Универзитетско студентско собрание.
Креаторот и уредникот на дигиталната студентска заедница „Студентарија“, потенцира, со оглед на тоа дека Националната стратегија која била за периодот 2013-2020 година, откако изминала, државата не донела нова стратегија, младите ќе заминуваат.
„Младите ни заминуваат и си одат. Она што го стекнуваат тука како искуство и она што државата го вложува во нив, понатаму тие го користат во други земји. Исклучително мал процент од тие кои државата ги пратила и платила да студираат во странство-се вратиле и она што го научиле таму да го искористат во нашата државата.Дополнително застрашувачко е што во ниту еден од овој случај не била активирана меницата, односно државата не преземала мерки според договорите што студентите ги потпишале пред да отидат во странство“, вели Гоше Николов-креатор и уредник на „Студентарија“.
Ревизорите, направиле и споредба на бројот на одобрени квоти за запишување на студенти во прв циклус на студии и запишани студенти во прв циклус на јавните високообразовни институции за периодот 2013-2023 година, каде се утврдени значителни разлики. Ревизијата добила одговор единствено од УКИМ дека има изготвено ваква анализа во 2019 година, во која е наведено дека одобрените квоти се нереални и високо поставени и потребно е истите да се намалат за околу 50%, бидејќи УКИМ со години не успева да ги пополни квотите од Конкурсот, што е уште еден показател дека недостасува анализа од страна на МОН.
Извор: 24vesti.mk
